2024 թվականի ապրիլի 13-ին, Վիրահայոց թեմի առաջնորդ Գրշ. Տեր Կիրակոս  եպիսկոպոս Դավթյանի օրհնությամբ,  թեմի «Սուրբ Գրիգոր Նարեկացի»  հոգևոր, կրթամշակութային կենտրոնի տարբեր խմբերի մասնակցությամբ ք. Ռուսթավիում տեղի ունեցավ միջոցառում՝ նվիրված  մեր Տեր Հիսուս Քրիստոսի Սուրբ Հարության տոնին:  

Կենտրոնի դահլիճը  բազմամարդ էր: Քաղաք Ռուսթավիի հայ համայնքի անդամները  եկել էին դիտելու երգով, պարով, արտասանությամբ, Սուրբ Զատիկին և դրան նախորդող Պահոց շրջանին   նվիրված եկեղեցական և  ժողովրդական ավանդույթների ներկայացումներով տոգորված  կենտրոնի սաների  ելույթները՝ նվիրված  Սուրբ Զատիկի ուրախությանը: 

Հավարտ միջոցառման  «Սբ. Գրիգոր Նարեկացի» կենտրոնի հոգևոր  հովիվ արժանապատիվ Տեր Հովսեփ քահանա Հարությունյանը ներկաներին շնորհավորելով  Սուրբ Զատիկի տոնի կապակացությամբ, փոխանցեց Վիրահայոց թեմի առաջնորդ Գրշ. Տեր Կիրակոս  եպիսկոպոս Դավթյանի օրհնությունը, շնորհավորանքներն ու բարեմաղթանքները:

Գեղեցիկ ելույթների  և հավուր պատշաճի կազմակետրպված միջոցառմանը հետևեց ավանդական «ձվակռիվ»  խաղը, որին  միացան մեծահասակները: Միջոցառումն ավարտվեց  ներկաներին համակած տոնական տրամադրությամբ:

Հայ Առաքելական Սուրբ Եկեղեցու տոնացույցով Մեծ Պահքի շրջանն է: 2024 թվականի մարտի 6-ին Պահքը կիսվեց, քանզի 24-րդ օրն էր: Այն կոչվում է Միջինք: Եկեղեցական այս տոնը ուղեկցվում է ժողովրդական սովորություններով ու ավանդույթներով, օրինակ, գաթա կամ բաղարջ թխելով: Արժանապատիվ հոգևոր հայրերի գլխավորությամբ Վիրահայոց թեմի եկեղեցիներում հավուր պատշաճի էին պատրաստվել տոնին՝ եկեղեցական տոնակատարությանը զուգակցելով ժողովրդական հանդիսությունը:

Վիրահայոց թեմի Թբիլիսիի Սուրբ Գևորգ առաջնորդանիստ և Հավլաբարի Սուրբ Էջմիածին  եկեղեցիներում կատարվեց «Հանգստյան» ժամերգություն, որից հետո օրհնվեցին անուշահամ գաթաները և բաժանվեցին հավատացյալներին: Նրանցից ոմանց ընկան եկեղեցու խաչի քավորների կողմից պատրաստված անակնկալները՝ օրհնված խաչերը:

Միջինքի օրը առանձնահատուկ շքեղությամբ և գաթայի փառատոնով նշվեց Սամցխե-Ջավախքի և Ծալկայի ընդհանուր առաջնորդական փոխանորդությունում: Հայոց  եկեղեցիների բակերում և շրջակա տարածքներում համերգային մասի ավարտից հետո կատարվեց եկեղեցասեր տիկնանց պատրաստած գաթաների օրհնության կարգ: Ներկայացրած գաթաները բոլորին զարմացրին իրենց գեղեցկությամբ և բուրումնավետ համով:

Միջինքը նշվեց նաև Բաթումի Սուրբ Փրկիչ եկեղեցում: Տոնակատարությանը մասնակցեցին Վիրահայոց թեմի Ալեքսանդր Մանթաշյանց կենտրոնի գեղարվեստական խմբերը՝ իրենց երգուպարով ուրախացնելով ներկաներին: Այստեղ ևս հայկական գաթան բաժանվեց հավատավոր ժողովրդին:

Հիրավի տոնական օրը  դարձավ հավատքով և աղոթքով Պահքի երկրորդ կեսը անցնելու և քրիստոնական սիրով Սուրբ Զատիկը դիմավորելու գրավական: