ԳՐԻԳՈՐ ՍԱՖԱՐՅԱՆԻ ՀԻՇԱՏԱԿԻՆ ՆՎԻՐՎԱԾ ԽԱՉՔԱՐԻ ՕԾՈՒՄ ԾՈՒՂՐՈՒԹ ԳՅՈՒՂՈՒՄ

2025 թվականի օգոստոսի 21-ին Վիրահայոց թեմի Ախալցիխեի շրջանի Ծուղրութ գյուղում տեղի ունեցավ Սբ. Սիոն եկեղեցու բակում կանգնեցված  խաչքարի օծման հանդիսավոր արարողություն: Խաչքարը Ռուբեն և Էդգար Սաֆարյան եղբայրների  բարերարությամբ նվիրվեց իրենց հոր՝  ՀՀ վաստակավոր ուսուցիչ, ճանաչված երգիչ Գրիգոր Սաֆարյանի հիշատակին: Նորահիմն խաչքարի Սրբալույս մյուռոնով օծման արարողությունը կատարվեց Վիրահայոց թեմի առաջնորդ Գերաշնորհ Տեր Կիրակոս եպիսկոպոս Դավթյանի ձեռամբ:

Խաչքարի օծման արարողությանը մասնակից էին Սամցխե-Ջավախքի և Ծալկայի ընդհանուր առաջնորդական փոխանորդ Հգշ. Տեր Նշան վարդապետ  Հմայակյանը, Ախալցիխե քաղաքի հոգևոր հովիվ և Ախալցիխեի և Բորժոմիի տարածաշրջանների հոգևոր տեսուչ Հգշ. Տեր Հակոբ աբեղա Սահակյանը, Ախալցիխեի շրջանի մերձակա գյուղերի և  ավանների  հոգևոր հովիվ արժ. Տեր Թորգոմ քահանա Վանդանյանը: Իրենց ներկայությամբ միջոցառումը պատվել էին Ախալցիխեի քաղաքապետ Իրակլի Լազարաշվիլին և   նրան ուղեկցող բարձրաստիճան պաշտոնյաները:

Թեմակալ առաջնորդ Գերաշնորհ Տեր Կիրակոս եպիսկոպոս Դավթյանը  իր օրհնության խոսքում անդրադարձ կատարեց խաչքարի խորհրդին,  գնահատանքի խոսքեր ուղղեց  բարերար որդիների կողմից  ծնողների հիշատակի նկատմամբ հարգանքի համար և ներկաներին շնորհավորեց  եկեղեցու բակում վեր խոյացած զարդանախշ խաչքարի բացման կապակցությամբ:  

Օրը Ծուղրութ գյուղում  տոնական դարձավ գյուղի մանկական «Նաիրի» պարային համույթի համերգով, որը կազմակերպել էր պարային խմբի ղեկավար,երջանկահիշատակ Գագիկ Գինոսյանի նախկին աշակերտ Հակոբ Սաֆարյանը:  

Վերջում Ռուբեն և Էդգար Սաֆարյան եղբայրների կողմից կատարվեց մատաղով հյուրասիրություն: