კულტურული დიალოგი თუმანიანის სახლში

თბილისმა უმასპინძლა სომეხ, ყაზახ და სხვა ქვეყნების მწერლებსა და საზოგადო მოღვაწეებს.

საქართველოს სომეხთა ეპარქიის წინამძღვრის, მისი ყოვლადუსამღვდელოესობის, ეპისკოპოს კირაკოს დავთიანის ლოცვა-კურთხევით, 2026 წლის 6 მაისს, თბილისში, „ჰოვანეს თუმანიანის სახლის“ სამეცნიერო-კულტურულ ცენტრში გაიმართა საზეიმო ლიტერატურული ღონისძიება.

შეხვედრა ორგანიზებული იყო ცენტრისა და საქართველოს მწერალთა კავშირის (თავმჯდომარე — მაყვალა გონაშვილი) ერთობლივი ინიციატივით, ყოველწლიური საერთაშორისო ფესტივალის „უპირველეს ყოვლისა — პოეზია“ ფარგლებში.

დიდი ლორელის სტუმართმოყვარე სახლში შეიკრიბნენ კულტურის მოღვაწეები და პოეზიის მოყვარულები სომხეთიდან, ყაზახეთიდან, იტალიიდან და ლატვიიდან, რათა თანამონაწილენი გამხდარიყვნენ სომხურ-ქართულ-ყაზახური კულტურული ხიდების განმტკიცების საქმეში.

ღონისძიების მთავარი ნაწილი იყო საქართველოსადმი მიძღვნილი ახალი საავტორო წიგნების პრეზენტაცია, რომლებიც წარადგინეს ცნობილმა მწერლებმა — ედვარდ მილიტონიანმა (სომხეთის მწერალთა კავშირის თავმჯდომარე, პოეტი და პროზაიკოსი), გალიმ ჟაილიბანმა (ყაზახეთის ცნობილი პოეტი) და საულე აბიშევამ (აბაის სახელობის ყაზახეთის ეროვნული პედაგოგიური უნივერსიტეტის პროფესორი).

სომხურ-ქართული ლიტერატურული კავშირებისა და ორი ხალხის ძმური ურთიერთობების განმტკიცებაში შეტანილი წვლილისთვის, საიათ-ნოვას სახელობის მადლობის სიგელით დაჯილდოვდნენ — საქართველოს სომეხთა ეპარქიის წინამძღვარი, მისი ყოვლადუსამღვდელოესობა, ეპისკოპოსი კირაკოს დავთიანი, თბილისის პ. ადამიანის სახელობის სახელმწიფო სომხური დრამატული თეატრის დირექტორი და სამხატვრო ხელმძღვანელი არმენ ბაიანდურიანი, გაზეთ „ვრასტანის“ მთავარი რედაქტორი ვან ბაიბურთიანი და სხვები.

შეხვედრის განმავლობაში გაისმა თანამედროვე პოეზია და გაიმართა გულწრფელი საუბარი ლიტერატურის როლსა და ერებს შორის კულტურული გაცვლის მნიშვნელობაზე.

მსგავსი საერთაშორისო ინიციატივები კიდევ ერთხელ ადასტურებს თუმანიანის სახლის მისიას — იყოს სხვადასხვა კულტურისა და შემოქმედთა შეხვედრის სიცოცხლით სავსე პლატფორმა.