Սուրբ և Անմահ պատարագ Սուրբ Սարգսի տոնին

2026 թվականի հունվարի 31-ին, Սուրբ Սարգիս զորավարի, նրա որդի Մարտիրոսի և 14 քաջ մարտիկների հիշատակության օրը, Վիրահայոց թեմի Սուրբ Գևորգ առաջնորդանիստ եկեղեցում, Թեմակալ առաջնորդ Գերաշնորհ Տեր Կիրակոս եպիսկոպոս Դավթյանի հանդիսապետությամբ, տոնական Սուրբ և Անմահ պատարագ մատուցեց արժանապատիվ Տեր Հուսիկ քահանա Հարությունյանը։

Եկեղեցին մարդաշատ էր, Սուրբ սեղանը զարդարում էր Սուրբ Սարգսին, նրա որդուն և զինակիցներին պատկերող մեծադիր գեղանկարը, որը յուրօրինակ պատկառանք էր տարածում Աստծու տանը:  Բազմաթիվ էին  երիտասարդները, ովքեր եկել էին աղոթելու  Սուրբի հիշատակին և հայցելու նրա բարեխոսությունը:  

Հավարտ Պատարագի, Թեմակալ առաջնորդը իր քարոզ խոսքում անդրադարձ կատարեց   Սուրբ Սարգիս զորավարի և նրա զինակիցների քրիստոնեական հավատի համար նահատակության պատմությանը,  խոսեց տոնի խորհրդի մասին, ուշադրություն հրավիրեց   արժանավայել ապրելու, նվիրումով  սուրբ երդմանը ծառայելու կարևորությանը և հորդորեց ներկաներին օգնել խեղճերին, կարիքավորներին, ապավեն դառնալ վտանգվածներին ու նեղյալնհերին, ապրել Սուրբ Սարգսի և նրա զինակիցների օրինակով:

Գերաշնորհ Տեր Կիրակոս եպիսկոպոսը շնորհավորեց սարգիսներին և մարտիրոսներին իրենց անվանակոչության օրվա առիթով, բարեմաղթանքի խոսքեր ուղղեց բոլոր երիտասարդներին և կատարեց նրանց օրհնության կարգ: