Վրացահայ երիտասարդները ծանոթանում են Թբիլիսիի հայկական հետքին

Վիրահայոց թեմի Երիտասարդական բաժինը շարունակում է Վրաստանի տարածաշրջանների հայ երիտասարդությանը ծանոթացնել Թբիլիսիի հայկական հետքին: Նախագիծն իրականացվում է «Քաղաքացիական երկխոսություն և գործնական քայլեր փոփոխությունների համար 2025» ծրագրի շրջանակներում «Jinishian Memorial Foundation» հիմնադրամի աջակցությամբ:

Միջոցառման նպատակն է հայ երիտասարդներին ծանոթացնելով մայրաքաղաքի տեսարժան և հիշարժան վայրերին, խորացնել նրանց  ինտեգրումը վրաց հասարակությանը,  խթանել նրանց լեզվական ու մշակութային զարգացումը,  ձևավորել երկրի հասարակության լիիրավ անդամի  քաղաքացիական պատասխանատվության  զգացումը։

2025 թվականի նոյեմբերի 22-ին Վիրահայոց թեմի առաջնորդ Գրշ. Տեր Կիրակոս եպիսկոպոս Դավթյանի օրհնությամբ,  Թեմի Երիտասարդական բաժինն իրականացրեց Մառնեուլի շրջանի  Կարմիր գյուղի  թվով 20  երիտասարդների այցը Թբիլիսի: Թեմի երիտասարդական բաժնի ղեկավարներ Էմիլ Սարգսյանի և  Աննա Մկրտիչյանի առաջնորդությամբ այն մեկնարկեց Հավլաբարի Սուրբ Էջմիածին եկեղեցուց՝ ստանալով արժանապատիվ Տեր Սամվել քահանա  Թորոսյանի օրհնությունը և լսելով  եկեղեցու պատմությունը:

Կարմիր գյուղի  երիտասարդները շրջայց կատարեցին «Հայարտուն» կրթա-մշակութային ու երիտասարդության կենտրոնում, իրենց խոնարհումը բերեցին Հայ գրողների և հասարակական գործիչների Խոջիվանքի պանթեոնում հուղարկավորվածների  հիշատակին:

Հովհաննես Թումանյանի տուն-թանգարանում երիտասարդները հետաքրքրությամբ լսեցին և  տեսան ինչպես Հովհ. Թումանյանի թբիլիսյան բնակարանի, այնպես էլ Վրաստանի մայրաքաղաքի մշակույթի, ճարտարապետության և ընդհանրապես քաղաքային կյանքի զարգացման գործում  հայ ժողովրդի ներդրման  և  հետքի մասին:

Տպավորիչ էր զբոսանքը հին թիֆլիսյան թաղամասում, որը շաղախված էր պատմական հմայքով և  ոճական անկրկնելիությամբ: Իսկ Քարվանսարայի թանգարանում տեսածն ու լսածը անջնջելիորեն տպավորվեց հայ երիտասարդների  հիշողության մեջ: 

Օրը եզրափակվեց ջերմ մթնոլորտում՝ ընկերական ընթրիքով: