«Զենիթ» բենդի և «Հայոս բենդ» համույթի համերգն ու ավանդական պարերի վարպետաց դասը Հավլաբարում

Հայ Առաքելական Ուղղափառ Սուրբ Եկեղեցու տոնացույցով, 2025 թվականի ապրիլի 27-ին Կրկնազատիկ էր:

Այդ  օրը Վիրահայոց թեմի առաջնորդ  Գրշ. Տեր Կիրակոս եպս. Դավթյանի օրհնությամբ,  Վիրահայոց  Թեմի  «Հայարտուն» կենտրոնը  (տնօրեն՝ Եվգենյա Մարկոսյան)   հյուրընկալեց ՀՀ «Մխիթար Սեբաստացի» կրթահամալիրի պատվիրակությանը Ավագ դպրոցի տնօրեն Մարթա Ասատրյանի  ղեկավարությամբ: Կրթամշակութային  այս երկու օջախներին միմյանց  կապում են տարիների համագործակցությունը և բազմիցս իրականացված նախագծերն ու համատեղ միջոցառումները:

Կրկնազատկի տոնը Հավլաբար թաղամասում նշվեց «Մխիթար Սեբաստացի»  կրթահամալիրի «Զենիթ» բենդի (ղեկավար՝ Արամ Սարգսյան), ավանդական պարի համույթի (պարուսուց՝ Համազասպ Ասլանյան), և  «Հայարտուն» կենտրոնի «Հայոս բենդ» վոկալ-գործիքային համույթի (գեղարվեստական ղեկավար՝ Վլադիմիր Ասատուրով) համատեղ համերգով և հայ ազգային պարի ուսուցման վարպետաց դասով, որին ընդգրկվեց նաև «Հայարտուն» կենտրոնի «Տարոն» պարային համույթը (պարուսույց՝ Սուրեն Աբրամյան): Հավլաբարում հնչեց հայկական երգն ու երաժշտությունը, տարածվեց  պարն ու  շուրջպարը:

Տոնական օրվա ուրախ տրամադրությունը անտարբեր չթողեց  ներկաներին, հայկական ավանդական շուրջպարին ընդգրկվել էին ահել ու ջահել, կին ու տղամարդ: Ուրախ  երգի ու պարի համերգն ու վարպետաց դասը հիրավի դարձավ ազգային մշակույթի տարածման գեղեցիկ միջոցառում: