«Բարի սամարացու քսակ» քրիստոնեական բարեգործական կազմակերպության նվերները թբիլիսահայ երեխաներին

2024 թվականի փետրվարի 10-ին, Թբիլիսիի Սուրբ Գևորգ առաջնորդանիստ եկեղեցին իր գիրկում ընդունեց թբիլիսաբնակ հայ երեխաներին, ովքեր  ներկայացնում էին  Թբիլիսիի թիվ 103 վրաց-հայկական հանրային դպրոցը (տնօրեն՝ Արչիլ Չխաիձե,  ուսմասվար Հասմիկ Պապիկյան), «Ջեյրան» պարային համույթը (գեղարվեստական ղեկավար Սվետլանա Երիցյան), «Անի» պարային համույթը (գեղ. ղեկավար Անգելինա Նազարյան-Քոչյան) և Վրաստանի հայ համայնք հասարակական կազմակերպությունը  (նախագահ՝ Արթուր Միրզոյան):

Կայացավ Վիրահայոց թեմի առաջնորդ Գերաշնորհ Տեր Կիրակոս եպիսկոպոս Դավթյանի հանդիպումը դեռահասների, նրանց ուսուցիչների, ծնողների և կազմակերպության ղեկավարների հետ: Թեմակալ առաջնորդը իր օրհնությունը բաշխելով ներկաներին, խոսեց քրիստոնեական հավատքի մասին,  կարևորեց մերձավորին սիրելու, միմյանց օգնելու և  բարություն  տարածելու գեղեցիկ հատկությունները, որ պետք է  ունենա և իր մեջ զարգացնի նրանցից յուրաքանչյուրը:

Գրշ. Տեր Կիրակոսը նաև անդրադարձ կատարեց տարիներ շարունակ իրենց հասակակիցներին Սուրբծննդյան նվերներով  ուրախացնելու  «Բարի սամարացու քսակ» քրիաստոնեական կազմակերպության գեղեցիկ ավանդույթին և հորդորեց  ներկաներին կողքինի նկատմամբ  ցուցաբերած ուշադրությամբ, հարգանքով և սիրով  նույնպես դառնան այս գեղեցիկ ավանդույթի շարունակողներ:

Վիրահայոց թեմի առաջնորդը բոլոր դեռահասներին բաժանեց քրիստոնեության մասին  նկարազարդ գրքեր և «Բարի սամարացու  քսակ» քրիստոնեական բարեգործական ընկերության Սուրբծննդյան նվերները: