Տարեմուտի Սբ. Պատարագ և Նռօրհնեքի կարգ Վիրահայոց թեմի Թբիլիսիի Հայոց եկեղեցիներում

2023 թվականի դեկտեմբերի 31-ը նախատոնական էր: Վիրահայոց թեմի գործող եկեղեցիներում մատուցվեց կիրակնօրյա Սուրբ Պատարագ:

Թբիլիսիի առաջնորդանիստ Սբ. Գևորգ եկեղեցում, թեմի առաջնորդ Գրշ. Տեր Կիրակոս եպիսկոպոս Դավթյանի հանդիսապետությամբ Սբ. Պատարագ մատուցեց Մայր Աթոռ Սուրբ Էջմածնից ժամանած արժանապատիվ Տեր Արարատ քահանա Պետրոսյանը:

Հավարտ Սբ. Պատարագի Թեմակալ առաջնորդը դիմեց ներկաներին ամանորյա  շնորհավորանքով և մաղթեց համայն աշխարհին և բոլոր ժողովուրդներին խաղաղություն և առողջություն:

Տարեմուտի գիշերը հայոց բոլոր եկեղեցիներում խորհրդանշական մի կարգ է կատարվում՝ նռնօրհնեք: Կարգը սահմանել է Ն.Ս.Օ.Տ.Տ. Գարեգին Երկրորդ Ամենայն հայոց կաթողիկոսը՝ 2015 թվականին: Նուռը խորհրդանշում է տարին և նրա յուրաքանչյուր օրը: Նռնօրհնեքով է ավարտվում հին տարին և սկսվում նորը:

Տարեմուտի օրը Վիրահայոց թեմի եկեղեցիներում կատարվեց նռնօրհնեքի կարգ:

Թբիլիսիի Հայոց եկեղեցիներում հավատացյալները երեկոյան ժամերգության էին գալիս նռներով զարդարված գեղեցիկ  զամբյուղներով և սկուտեղներով:

Թբիլիսիի Սբ. Գևորգ առաջնորդանիստ եկեղեցում թեմակալ առաջնորդ Գրշ. Տեր  Կիրակոս եպիսկոպոս Դավթյանի  գլխավորությամբ, հոգևոր դասի մասնակցությամբ և հավատացյալ հոտի ներկայությամբ տեղի ունեցավ Ժամերգություն և Գոհաբանական մաղթանք: Թեմակալ առաջնորդի գլխավորությամբ օրհնվեց նուռը, որպես ազգային խորհրդանիշ, որը ներառնում է նաև տարվա բոլոր օրերը և տարբեր ազգի և  դավանանքի ժողովուրդներին:

Իսկ Հավլաբարի Սուրբ Էջմիածին եկեղեցում, երեկոյան ժամերգության վերջում, արժանապատիվ Տեր Սամվել քահանա Թորոսյանը փոխանցեց թեմակալ առաջնորդի օրհնությունը և խոսեց նռնօրհնեքի խորհրդի մասին, հորդորեց՝ Ամանորի շեմին մեր եկեղեցու պատգամով գալիք տարվա յուրաքանչյուր օրը ապրել Աստծո օրհնության ներքո, Աստծո պատվիրանների համաձայն:

Երկու եկեղեցիներում ներկաներին բաժանվեց օրհնված նուռը:

Հավլաբարի Սուրբ Էջմիածին եկեղեցում  բարերարությամբ Արմեն Պետրոսյանի,  Կարեն Սարգսյանի, Ռոլանդ Սահակյանի, Ալլա Չոբանյանի, Արմեն Դեգոյանի,Արթուր Դերզյանի,  ինչպես նաև եկեղեցու նվիրյալ ընտանիքի զավակներ  Քրիստինե և Ժաննա  Հարությունովա  քույրերի  օժանդակությամբ եկեղեցու  40 ընտանիքների բաժանվեցին  ամանորյա  փաթեթներ:

Գոհաբանական աղոթքով և նռնօրհնեքի կարգով Վիրահայոց թեմի գործող եկեղեցիներում ավարտվեց 2023 տարին: