Հայերեն 
ქართული 
English 
Русский 
Վրաստանում և Հայաստանի Հանրապետությունում Դանիայի թագավորության դեսպանը այցելեց Թբիլիսիի Սբ. Գևորգ առաջնորդանիստ եկեղեցի
Հայաստանյայց Առաքելական Ուղղափառ Սուրբ Եկեղեցու Վիրահայոց թեմում շարունակվում է Վրաստանում իրենց գործունեությունն իրականացնող դիվանագետների հյուրընկալությունը:
2023 թվականի դեկտեմբերի 8-ին, Վիրահայոց թեմի առաջնորդանիստ Թբիլիսիի Սուրբ Գևորգ եկեղեցի այցելեց Վրաստանում և Հայաստանի Հանրապետությունում Դանիայի թագավորության արտակարգ և լիազոր դեսպան Աննե Թովթ Սորենսը:
Վիրահայոց թեմի առաջնորդ Գրշ. Տեր Կիրակոս եպիսկոպոս Դավթյանը հյուրընկալեց տիկին Սորենսին, նրան ծանոթացրեց Թեմի կառուցվածքի, եկեղեցիների թվաքանակի և աշխատանքների հետ: Սրբազան Հայրը զրույցում ընդգծեց Թեմի գործունեության յուրահատկությունը, որը հոգևորի հետ միասին կարևորում է նաև Թեմի հովանու ներքո գործող կրթամշակութային և երիտասարդական կենտրոնների գործունեությունը, խոսեց ներկայումս տարվող աշխատանքների և ապագայի պլանների ու ծրագրերի մասին:
Հանդիպման ընթացքում երկուստեք ընդգծվեց նշված ձևաչափի կարևորությունը, ինչին հետևեց կողմերի համաձայնությունը նման երկխոսությունները շարունակելու անհրաժեշտության մասին:
Գրշ. Տեր Կիրակոս եպիսկոպոսը և հյուրերը շրջայց կատարեցին հինավուրց առաջնորդանիստ եկեղեցում, լսեցին եկեղեցու պատմությունը և դիտեցին եկեղեցու պատերը զարդարող որմնանկարները:
Հանդիպմանը մասնակցեցին Համայնքային նախաձեռնությունների զարգացման հիմնադրամի հիմնադիր Առնոլդ Ստեփանյանը և հիմնադրամի ղեկավար Մարի Միքոյանը:
