Материалы

Վիրահայոց թեմի եկեղեցիներում նշվեց Խաչվերացի տոնը

Վիրահայոց թեմում հավուր պատշաճի նշանավորվեց  Հայ Առաքելական Սուրբ Եկեղեցու հինգ տաղավար տոներից վերջինը՝ Խաչվերացը կամ Խաչի վերացման տոնը: Տոնը շարժական է և Հայաստանյայց Սուրբ Եկեղեցու օրացույցով, 2021 թվականին  նշվեց սեպտեմբերի 12-ին:

Չնայած կորոնավիրուսի կապակցությամբ երկրում գործող սահմանափակումներին, քաղաքային տրանսպորտի բացակայությանը, այնուամենայնիվ  հավատացյալների  ներկայությունը  Թբիլիսիում գործող երկու՝ Սուրբ Գևորգ առաջնորդանիստ և Հավլաբարի Սուրբ Էջմիածին եկեղեցիներում, բավարար էր:

 Թբիլիսիի Սուրբ Էջմիածին եկեղեցում  տոնական օրը սկսվեց Վիրահայոց թեմի առաջնորդական տեղապահ հոգեշնորհ Տեր Կիրակոս վարդապետ Դավթյանի հանդիսապետությամբ և փոխառաջնորդ հոգեշնորհ Տեր Նշան վարդապետ Հմայակյանի  ներկայությամբ մատուցված Սուրբ Պատարագով:

Հընթացս Սուրբ Պատարագի, Պատարագիչ Տեր Սամվել քահանա Թորոսյանը հավուր պատշաճի   քարոզ խոսեց օրվա խորհրդի մասին: Վերջինս անդրադարձ կատարեց խաչի մեծարմանը նվիրված տոներին, գերությունից Տիրոջ խաչափայտի վերադարձին և Գողգոթայում կանգնեցմանը,  որտեղից էլ տոնը կոչվում է Խաչվերաց կամ, ինչպես ժողովրդի շրջանում է ընդունված՝ Սըրբխեչ:

Սուրբ Պատարագի ավարտին հոգեշնորհ Տեր Կիրակոս վարդապետ  Դավթյանը դիմելով   հավատացյալ բազմությանը, մեկնաբանեց խաչի նշանակությունը և զորությունը, հավատացյալներին հորդորեց անսասան մնալ իրենց հավատքին, արժանի լինել խաչը կրելու պատվին,  արժևորել, պահպանել, սերունդներին փոխանցել եկեղեցական և ազգային տոները, անքակտելի պահել կապը Աստծու տան հետ:

Հայոց եկեղեցու տաղաավար տոնը՝ Խաչվերացը իր ներկայությամբ պատվել էր Թբիլիսիի Իսանի շրջանային վարչության նախագահի պաշտոնակատար Կախաբեր Լաբուչիձեն: Վերջինս ինքնակառավարման մարմինների  նախընտրական քարոզարշավի շրջանակներում, Սուրբ Գևորգ առաջնորդանիստ եկեղեցի այցելությունից հետո, եղավ նաև Հավլաբարի Սուրբ Էջմիածին եկեղեցում: Սուրբ Պատարագի ավարտից հետո նա երկար ժամանակ մնաց  եկեղեցու բակում,  հնարավորություն ընձեռելով  ներկաներին մոտենալու և  իրենց հուզող հարցերի մասին իրազեկելու  պատգամավորության թեկնածուին:

Նույն օրը  Հայոց եկեղեցիներում տեղի ունեցավ  Սուրբ Խաչի վերացման փառաբանողական արարողություն: Երեկոյան ժամերգությունից հետո հոգևորականաց դասի առաջնորդությամբ, սարկավագներից ու  հավատացյալներից բաղկացած թափորը  խաչը պտտեցրեց եկեղեցիների շուրջը, վարդաջրով օրհնելով է ժողովրդին:  Շարականների երգեցողությամբ պտույտներն ավարտելուց հետո, օրհնվեց ռեհանը, որը համարվում է խաչի ծաղիկ: Օրհնված ռեհանը բաժանվեց  հավատացյալներին:

Խաչվերացի տոնը Սրբազան Պատարագով նշանավորվեց Վիրահայոց թեմի բոլոր գործող եկեղեցիներում:

Երկուշաբթի օրը՝ սեպտեմբերի 13-ին,  հիշատակ Մեռելոց է: Վիրահայոց թեմի եկեղեցիներում  կկատարվի հոգեհանգստյան կարգ՝ ննջեցյալների հոգու խաղաղության համար:

Image 12 09 21 12 51

Կոնտակտ

5, Samghebro St., 0105 – Tbilisi, Georgia
Phone: +995322724111
Email: Այս էլ-փոստի հասցեն ծածկագրված է թափոնափոստի բոթերից։ Այն տեսնելու համար անհրաժեշտ է միացնել JavaScript։

 ©2024 Վիրահայոց թեմ. Բոլոր իրավունքները պաշտպանված են